*EPI-p NNK-llu NPU-konferencemi peqataaneranni siunissami suleqatigiinnissamik isumaqatigiissutit aamma nipilersortartut taalliortullu pisinnaatitaaffii sammineqarput
EPI NNK-lu Nunani Avannarlerni NPU-konferencemi ulluni 30.-31.august 2024 peqataapput. NNK sinnerlugu Georg Olsen aamma Nikolaj Lønstrup, EPI sinnerlugu Aili Liimakka Laue.
NPU-mi siunissami ataatsimoorussamik suliniutit sammineqarput. Ataatsimeersuarnerup nipilersornermik suliaqartunut pingaarutillit katersorpai, EPI-p NNK-llu peqataanermigut oqallinnerni Kalaallit Nunaanni nipilersortartut suleqatigiinnerulernissaannik aamma Nunani Avannarlerni suleqatigiinnermut sinniisuunerulernissamillu qanoq pitsanngorsaasoqarsinnaanersoq eqqartorpai.
Oqallinnerni sammineqarpoq, Kalaallit Nunaata Europami nipilersornermik kulturikkut saqquminerulersinnaanera, niueqatigiinnerup ataani suleqateqarnikkut, aammalu Kalaallit Nunaata immikkut ittumik unammilligassai eqqarsaatigalugit Nunani Avannarlerni nunarsuarmilu tamarmi tusarneqarsinnaanerat.
Ataatsimeersuarnerup politikkikkut Nunani Avannarlerni nipilersortartunut sunniuteqartunik sammisaqartitsivoq, soorlu pisinnaatitaaffinnut tunngasut, isertitaqarnermut piginneqqaartussaatitaanermullu apeqqutit sammineqarput. EPI-p NNK-llu Kalaallit Nunaata pissutsit immikkut ittut ilanngunneqarnissaat sulissutigaat.
EPI-p NNK-llu Nunani Avannarlerni allat peqataasut peqatigalugit ataatsimoorussamik aaqqissuussinerit, soorlu ataatsimiinnerit, nipilersornerit, saqqummersitsinerit festivaleqarnikkullu oqaluuseraat. Tamanna suleqatigiinnerup pitsanngorsarnissaanik aammalu Kalaallit Nunaanni nipilersortartut periarfissinneqarnerulernissaannik siunertaqarpoq.
Eqqumiitsuliornermik ingerlatsisut pinngorartitsisullu pisinnaatitaaffii:
EPI-p Kalaallit Nunaanni eqqumiitsuliornikkut suliaqartunut pisinnaatitaaffiit illersorneqarnissaat, pingaartumik nipilersortartunut nittartakkatigut atuinermut tunngatillugu, periarfissaqartitsinerullunilu killilersuisoqannginnissaa pingaartippaa. EPI neriorsuivoq inatsisit atuuttut malinneqarnissaannik qulakkeerinninnissaq sulissutigissallugu, Kalaallit Nunaanni eqqumiitsuliornikkut suliaqartunut pisinnaatitaaffiit naligiimmillu atugassaqartitsineq anguniagaralugu.
EPI Nunat Avannarliit peqatigalugit suleqatigiinnerulernissamik nukittorsaanissamut sulissuteqassaaq, aammalu siunissaq eqqarsaatigalugu suleqatigiinnissamik isumaqatigiissutit annertusarneqarnissaat. Kalaallit Nunaanni nipilersortartut tusaaneqarnerulernissaat, ilisimaneqalersinnaanerat annertusarneqarnissaa anguniarlugu.
- Georg Olsen, NNK-mi siulittaasoq EPI-milu siulittaasup tullia, oqarasuaat: 237689
- Aili Liimakka Laue – EPI-mi allattoqarfimmi aqutsisoq, oqarasuaat: 225680
*EPI (Eqqumiitsuliornikkut Pinngorartitsisut Ingerlatsisullu) NNK (Nunatta Nipilersortartuisa Kattuffiat) NPU (Nordic Popular Music Authors’ Union)